ភ្នំពេញ៖ ក្រសួងសាធារណការនិងដឹកជញ្ជូនកំពុងរៀបចំផលិតវីដេអូរស្ពតណែនាំស្តីពីការប្រើប្រាស់ផ្លូវល្បឿនលឿនភ្នំពេញ- ព្រះសីហនុ ដើម្បីកុំឲ្យមានបញ្ហាកើតក្នុងពេលធ្វើដំណើរ។

អ្នកនាំពាក្យក្រសួងសាធារណការ និងដឹកជញ្ជូនលោក ហ៊ាង សុទ្ធាយុត្តិ បានឲ្យដឹងថាមកដល់ពេលនេះ ផ្លូវល្បឿនលឿនភ្នំពេញ-ព្រះសីហនុសម្រេចការសាងសង់បាន ៨៤,៣៣ភាគរយហើយ ដោយគ្រោងបញ្ចប់ការស្ថាបនារួចរាល់នៅចន្លោះពីខែកក្កដា និងខែកញ្ញា ២០២២ខាងមុខនេះ។ លោកបន្ថែមថាដោយសារតែផ្លូវនេះជាផ្លូវល្បឿនលឿនដំបូងរបស់កម្ពុជា ដូច្នេះដើម្បីឲ្យប្រជាពលរដ្ឋយល់ដឹងពីរបៀបប្រើប្រាស់នោះ ក្រសួងសាធារណការកំពុងរៀបចំផលិតវីដេអូ ស្ពត ណែនាំស្តីពីការប្រើប្រាស់ ជាពិសេសត្រង់ចំណុចចេញចូល តាមផ្លូវបំបែកនីមួយៗ ធ្វើយ៉ាងណាឲ្យប្រជាពលរដ្ឋយល់ពីរបៀបប្រើប្រាស់ ដើម្បីបញ្ចៀសកុំឲ្យមានបញ្ហាកើតក្នុងពេលធ្វើដំណើរ។

សូមបញ្ជាក់ថា គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ មានប្រវែងសរុបជាង ១៩០គីឡូម៉ែត្រ វិនិយោគដោយក្រុមហ៊ុនចិនក្នុងទំហំទឹកប្រាក់ជាង២ពាន់លានដុល្លារអាមេរិក៕